Bakoet masak sajoer asin
Bahan2 jang diperloeken: 0.5 Kg Bakoet (toelang iga babi), dipotong sedang, 2-3 ikat sajoer asin djoega dipotong sedang, 6 bidji bawang merah, 6 sioeng bawang poetih diarsir (*parut), 1 djari djahe potong tipis2, sedikit minjak babi. Tjara memasak'nja. Bakoet ditjoetji bersih, laloe reboes dengen aer mendidih sampe tjoekoep empoek. Bawang merah, poetih dan djahe goreng sebentar, djangan terlaloe koening, laloe reboesan bakoet tadi berikoet koewah'nja ditoeang masoek, menjoesoel sajoer asin'nja. Bakoet boleh djoega diganti dengen daging Samtjan potong2 tipis. Bila koerang asin boeboehi garem setjoekoep'nja.
Bakoet masak Kelan
Bahan2 jang diperloeken: 0.5Kg bakoet potong sedang. Boemboe'nja; 2 bidji tjabe merah boewang bidji'nja, kaloe soeka pedas tambah beberapa bidji tjabe rawit, 8 bidji bawang merah, 1 iboe djari langkoeas digetjek (*tumbuk), 1 sendok teh trasi jang baek sebisa'nja bikinan Sidoardjo, garem setjoekoep'nja dan santan. Tjara memasak'nja: Bakoet ditjoetji bersih laloe reboes dengen aer setjoekoep'nja sampe agak empoek, baek tjampoer sedikit daging poetih (*minjak Babi) sekedar'nja, soepaia ada minjak. Boemboe2 diatas di-oelek sampe aloes betoel, laloe masoeken dalem reboesan bakoet tadi berikoet 1 tjangkir santan. Masoeken 2 bidji tjempaloek (Asem moeda), asem ini kaloe keliatan'nja soedah mateng diangkat laloe pentjet masoeken lagi, reboes teroes sampe bakoet'nja betoel2 empoek.
